wisal stuido
«تىنچ ئولتۇرۇپ غىزالىناي دېسىڭىز خىتايلار كەتكەندىن كېيىن كېلىڭ»


گېرمانىيە مېھمانسارايلىرى «تېنچ ئولتۇرۇپ غىزالىناي دېسىڭىز جۇڭگولۇقلار كەتكەندىن كېيىن كېلىڭ» دەپ جۇڭگولۇقلاردىن ئاگاھلاندۇرۇش كارتىسى تارقاتتى
 

يەرشارى ۋاقىت گېزىتىنىڭ 10-ئىيۇل خەۋىرى: گېرمانىيە «Velt» ھەپتىلىكىنىڭ 9-ئىيۇلدىكى سانىدا، مەزكۇر ژورنالنىڭ ساياھەت سەھىپىسى تەھرىرى سىتىفان ئورت (Oort Steffan)نىڭ ئۆز بېشىدىن ئۆتكۈزگەن «مېھمانخانىلاردىكى جۇڭگولۇقلاردىن ئاگاھلاندۇرۇش» ناملىق ماقالىسى بېسىلغان. ئورتنىڭ دېيىشىچە، ئۇ يېقىندا گېرمانىيەنىڭ باۋارىيەدىكى بىر مېھمانسارايدا قونۇش ئۈچۈن رەسمىيەت ئۆتەۋاتقاندا، بىر دانە «جۇڭگولۇقلاردىن ئاگاھ بولۇڭ» كارتىسى تاپشۇرۇۋالغان بولۇپ، ئۈستىدە مېھمانلارنى «جۇڭگو مەدەنىيەت ئالاھىدىلىكىنىڭ تاماق ئۈستىلى قائىدە-يوسۇنى»دىن ئاگاھلاندۇرغان. مەزكۇر ماقالە توردا تارقىتىلغاندىن كېيىن، بىر قاتار بەس-مۇنازىرە قوزغىغان ھەمدە «ئىرقى كەمسىتىش» خاھىشى بار دەپ ئەيىبلەشكە ئۇچرىغان.
ئورتنىڭ دېيىشىچە، ئۇ مېھمانخانىغا ئورۇنلىشىپ بولغاندىن كېيىن، ئەتە ئەتىگەن چۈشتىن بۇرۇن سائەت ئالتە يېرىمدىن يەتتە يېرىمغىچە چوڭ بىر جۇڭگو ساياھەت ئۆمىكى تاماققا كېلىدۇ، ئۇلار بەلكىم «ياۋروپا ئەنئەنىۋىي تاماق ئۈستىلى قائىدە-يوسۇنلىرىغا يۇقىرى شاۋقۇن-سۈرەن» قوشۇپ قويۇشى مۇمكىن، دەپ يېزىلغان ئاگاھلاندۇرۇش ئۇقتۇرۇشى تاپشۇرۇۋالغان. «جۇڭگولۇقلاردىن ئاگاھ بولۇڭ» كارتىسىدا: «مېھمان، سىز ھەرگىزمۇ جۇڭگولۇقلارنىڭ تاماق يېگەندىكى ئاۋازى بىلەن كېكىرگەن ئاۋازىنىڭ تەسىرىگە ئۇچرىماڭ، چۈنكى بۇ جۇڭگولۇقلارنىڭ يېيىش مەدەنىيىتىنىڭ بىر قىسمى»، «مۇبادا جىمجىت ئولتۇرۇپ ناشتا قىلماقچى بولسىڭىز، سائەت سەككىزدىن كېيىن كېلىڭ» دەپ يېزىلغان. ئورتنىڭ دېيىشىچە، ئۇ شۇ كۈنى كەچتە مېھمانساراينىڭ قاۋاقخانىسىدا بىر جۇڭگولۇق ياش ئايال ساياھەت يېتەكچىسىنىڭ ئىتالىيىلىك خىزمەتدىشى بىلەن ئىتالىيىدىكى 48 سائەتلىك ساياھەت پىلانى توغرىسىدا سۆزلىشىۋاتقانلىقىنى ئاڭلىغان. ئايال ساياھەت يېتەكچىسى قولىدا ئايپەددىكى خەرىتىنى كۆرسىتىپ تۇرۇپ، مىلاندىن يولغا چىقىپ پىروتوفىينو (Portofino)غا بېرىشنى، ئۇنىڭدىن كېيىن يەنە 300كىلومېتىر يىراقلىقتىكى سيەننا(Siena)غا بېرىشنى ئارزۇ قىلىدىغانلىقىنى ئېيتقاندا ئىتالىيەلىك خىزمەتدىشى سەل بىزار بولغاندەك قىلىپ: «سەن يېقىن دېگەن بىلەن مەنچە بۇ يېقىن ئەمەس» دېگەن.

ئورتنىڭ دېيىشىچە، ئىككىنچى كۈنى ئۇ ئەتىگەن سائەت ئالتە يېرىمدا رېستۇرانغا كېلىپ، جۇڭگولۇق ساياھەتچىلەرنىڭ قولىدىكى قوشۇق بىلەن كىچىك بولكىلارنى چېكىپ بېقىۋاتقانلىقىنى، تۇزدا قورۇلغان كاۋاۋىچىن تەملىك چۈرۈك قوتۇرماچنى قولىغا ئېلىپ بولۇپ يەنە قويۇپ قويغانلىقىنى، بۇزۇپ سۆزلىگەن ئېنگىلىزچىسىنى پەقەتلا چۈشەنگىلى بولمايدىغانلىقىنى، ئۇلارنىڭ مۇلازىملارغا «مەرھەممەت»، «رەھمەت» قاتارلىق سۆزلەرنىمۇ ئىشلەتمەيدىغانلىقىنى كۆرگەن. شۇ رېستۇراننىڭ بىر خىزمەتچىسى گېرمانىيەلىك مېھمانلارغا ئاستا قىلىپ: «ئۇلار كەتسە مەن بەك خۇش بولۇپ كەتكەن بولاتتىم» دېگەن. مەزكۇر ماقالىدە، نېمە ئۈچۈن بۇنداق بىر «جۇڭگولۇقلاردىن ئاگاھ بولۇڭ» كارتىسىنىڭ تارقىتىلىدىغانلىقى توغرىسىدا مېھمانساراينىڭ دېرىكتورى: «بىز ئالدىنئالا مۇشۇنداق ئاگاھلاندۇرۇش قىلساق، باشقا مېھمانلارنىڭ ئەرز-شىكايەتلىرىدىن قۇتۇلۇپ قالىمىز» دەپ چۈشەندۈرۈش بەرگەنلىكى يېزىلغان.


مەزكۇر ماقالە «Velt» ھەپتىلىكىنىڭ تور بېكىتىدە قاتتىق بەس-مۇنازىرە قوزغىغان بولۇپ، نەچچە يۈزلىگەن تورداشلار ئۆزلىرىنىڭ كۆز قاراشلىرىنى ئېلان قىلغان. phrasensport ئىسىملىك بىر تورداش «بۇ دېگەن ئىرقىي كەمسىتىش، گېرمانىيەلىك بولۇش سۈپىتى بىلەن بۇ ئىشتىن بەكمۇ ئوڭايسىزلىق ھېس قىلماقتىمەن.» دېگەن. يەنە ئاز بولمىغان تورداشلار ماقالىدە تىلغا ئېلىنغان جۇڭگولۇق ساياھەتچىلەرنىڭ بۇ خىل ناچار ئادەتلىرىنىڭ ھەقىقەتەنمۇ مەۋجۇتلىقىنى، بۇنداق ئادەتنى ۋاقتىدا تۈزىتىش كېرەكلىكىنى ئېيتقان. گېرمانىيەدە ساياھەت قىلىۋاتقان بەزى جۇڭگولۇقلار، مەزكۇر مېھمانساراينىڭ كىچىك ئىشنى چوڭايتىۋەتكەنلىكىنى، بۇنداق قىلسا جۇڭگولۇقلارنى قورقىتىپ قاچۇرۇپ قويىدىغانىقىنى ئېيتقان.
(شارافەت)
 

                                                                             مەنبە: ئوكيان تورىدىن ئېلىندى.


كۆرۈلۈشى: 1524 \ يوللانغان چېسلا: 2014-10-18
ئىنكاس يوللاش
ئىسم:
ئېلخەت:
ئىنكاس:
توغرىلاش كودى: